ប្រាំ​ពីរនាក់​ស្លាប់​ ក្នុងឧបទ្ទវហេតុ​រថ​យន្ដ​ក្រុង​បុក​រថ​យន្ដ​កង​ទ័ព

នគរបាល​បាន​និយាយថា មនុស្ស​ប្រាំ​ពីរ​នាក់ បាន​ស្លាប់​ និង​២១នាក់ទៀតបាន​រង​របួស​កាលពីម្សិលមិញនៅ​ពេល​ដែល​រថ​យន្ដ​ក្រុង​មួយ​គ្រឿង​បាន​បុក​រថ​យន្ដ​កង​យោធពល​ខេម​រភូមិន្ទ​នៅ​ក្នុង​ខេត្ត​កំពង់​ធំ តាមបណ្ដោយ​​​ផ្លូវ​ជាតិ​លេខ​៥។ លោក​ យ៉ង សំ អធិការ​នគរបាល​ស្រុក​ស្ទោង បាន​មាន​ប្រសាសន៍ថា រថយន្ដ​ក្រុង​របស់​ក្រុម​ហ៊ុនកាពីតូល កំពុង​តែ​ធ្វើ​ដំណើរ​ពី​រាជ​ធានី​ភ្ន​ំ​ពេញ​ ឆ្ពោះទៅ​ក្រុង​សៀម​រាប​ ស្រាប់​តែ​ពេល​នោះ​ បាន​បុក​ជាមួយរថយន្ដ​កង​ទ័ពចំពីមុខ​នៅ​ម៉ោង​ប្រហែល​២និង​៣០​នាទី​រសៀលក្នុង​ឃុំ​ប្រឡាយ។ លោកបាន​មាន​ប្រសាសន៍បន្ថែម​ទៀត​ថា ទាហាន​​នៃ​កង​យោធពល​ខេមរភូមិន្ទ​បួននាក់ ជិះ​ក្នុង​រថយន្ដ​នោះ​ ដែល​ធ្វើដំណើរ​​ពី​ខេត្ត​សៀម​រាបមក​រាជ​ធានី​ភ្នំពេញ និងដឹក​កំណាត់​ឈើធ្វើគ្រឿងសង្ហារិម និង​​អ្នក​ដំណើរ​បីនាក់ នៅ​ក្នុង​រថយន្ដ​ក្រុង ​បាន​ស្លាប់​ក្នុង​ហេតុ​ការណ៍នេះ។ លោក​ យ៉ង សំ បាន​បន្ថែម​ថា“ យើង​មិន​ទាន់ទទួល​ព័ត៌មាន​ច្បាស់​លាស់​នៅ​ឡើយ​ទេ។ យើង​កំពុង​តែធ្វើ​ការ​សន្និដ្ឋាន​អំពី​ឧបទ្ទវហេតុ​នេះ”។ រូប​ភាព​នៅ​ទី​កន្លែង​កើត​ហេតុ​ ចេញ​ផ្សាយ​តាម​គេហ​ទំព័រ​ព័ត៌មាន​ក្នុង​ស្រុក​បាន​បង្ហាញ​សាក​សព​ដេក​ស្ដូក​ស្ដឹង​កៀ​ប​ជាប់​បំណែក​ដែក​​រថ​យន្ដ​ទាំង​ពីរ​។ លោក​ ហ៊ុនហៀតនាយ​នគរបាល​ចរាចរ​ស្រុក​ស្ទោង ​មាន​ប្រសាសន៍ថា អ្នក​ដំណើរ​ចំនួន​២១​នាក់ ត្រូវ​បាន​បញ្ជូន​ទៅ​មន្ទីរ​ពេទ្យ​បង្អែកស្រុក​។លោក​បាន​មាន​ប្រសាសន៍ថាអ្នក​ដំណើរ​ពីរនាក់ ក្នុងចំណោមអ្នក​ដំណើរ​​តាម​រថយន្ដ​ក្រុងបាន​ស្លាប់​នៅ​នឹង​កន្លែង​កើត​ហេតុ​ ហើយ​ម្នាក់​ទៀត​បាន​ស្លាប់​តាម​ផ្លូវ​ពេល​បញ្ជូន​ទៅ​កាន់​មន្ទីរ​ពេទ្យ។ លោក​បាន​មាន​ប្រសាសន៍​បន្ថែម​ថា ទាហាន​នៃកង​យោធ​ពល​ខេមរ​ភូមិន្ទ​បីនាក់ និង​ជន​ស៊ីវិល​ម្នាក់ ដែល​ធ្វើ​ដំណើរ​ក្នុង​រថយន្ដ​យោធា​នេះ​ដែរបាន​ស្លាប់​នៅ​នឹង​កន្លែង​។ លោក​ ហ៊ុនហៀតបានមាន​ប្រសាសន៍​ថាការ​បុក​នេះ​បាន​កើត​ឡើង​បន្ទាប់​ពី​រថ​យន្ដ​កង​យោធពល​ខេម​រភូមិន្ទ​បែក​កង់​ ហើយ​រេ​ចង្កូត​។ នៅពេលឃើញ​រថ​យន្ដ​កង​យោធ​ពល​ ​ខេម​រភូមិន្ទ​ឆ្លង​គំនូស​របស់​ខ្លួន​ រថយន្ដ​ក្រុង​បាន​ព្យាយាម​គេច​រថយន្ដ​នេះ​ ហើយ​រេចង្កូត​ទៅ​ខាង​ឆ្វេង​ដៃ។ប៉ុន្ដែរថយន្ដ​នេះ​បាន​កាច់​មក​វិញ​ ហើយបាន​បុក​គ្នា​ ក្នុង​ចំណែក​ផ្លូវ​របស់​រថយន្ដ​កង​យោធពល​ខេមរ​ភូមិន្ទវិញ។លោក​បន្ថែម​ថា “ ប្រសិន​បើ​អ្នក​បើក​រថយន្ដ​ក្រុង​​នៅ​តែ​ប្រកាន់​ស្ដាំ​ គាត់​នឹង​មិន​ជួប​គ្រោះ​​ថ្នាក់នោះ​ទេ”។លោក​​ ហួរសុខវ៉ាន់ជំនួយ​ការ​អ្នក​គ្រប់​គ្រង​នៅ​ឯ​ក្រុម​ហ៊ុន​កាពីតូល បាន​មាន​ប្រសាសន៍ថា លោក​មិន​ទាន់​បាន​ទទួល​របាយ​ការណ៍លម្អិត​អំពីការ​បុក​គ្នានេះទេ ប៉ុន្ដែ លោក​​មាន​ប្រសាសន៍ថាអ្នក​ដំណើរ​២៤នាក់ ដែល​ធ្វើ​ដំណើរ​តាម​រថយន្ដ​ក្រុង​នេះ​សុទ្ធ​តែ​ពល​រដ្ឋ​កម្ពុជា។ លោកបាន​បង្វែរ​សំណួរ​ទៅ​ក្រុម​ហ៊ុន​ធានា​​រ៉ាប់​រង​កាំមិនកូ របស់​ក្រុម​ហ៊ុន​រថយន្ដ​ក្រុង​នេះ។ អ្នក​តំណាង​ម្នាក់​របស់​ក្រុម​ហ៊ុន​កាំមិនកូ បាន​និយាយ​ថា ពួកគេ​មិនទាន់​ទៅ​ដល់​កន្លែង​កើត​ហេតុ​នៅ​ឡើយទេ​ ដូច្នេះ​ មិន​​អាច​ធ្វើ​អត្ថាធិប្បាយ​បាន​ឡើយ​។ លោកហ៊ុលឈឿនប្រធាន​ផ្នែក​វះកាត់​នៅ​មន្ទីរ​ពេទ្យ​បង្អែកស្រុក​ស្ទោង​ បាន​មាន​ប្រសាសន៍ថា បុរស​បីនាក់ និង​ស្ត្រី​បួន​នាក់បាន​​បញ្ជូនមក​ដល់​មន្ទីរ​ពេទ្យ​ហើយ ដោយ​ពួកគេ​បាក់​ឆ្អឹង​ជើង​ និង​ដៃ​ ឬ​ប្រេះ​លលាដ៍​ក្បាល​។ មនុស្ស​១៤នាក់ទៀត​កំពុង​ត្រូវ​ព្យាបាល​ ដោយ​សារ​របួស​ស្រាល​។ លោក​​មាន​ប្រសាសន៍​បន្ថែមថា “ក្រុម​ហ៊ុន​ធានា​រ៉ាប់​រង​កំពុង​តែ​បញ្ជូន​ពួូកគេ​ទៅ​មន្ទីរ​ពេទ្យ​កាល់​មែ៉ត​ ក្នុង​រាជធានី​ភ្នំពេញ”។ អ្នក​ដំណើរ​១៣នាក់បាន​រង​របួស​កាលពី​ខែ​មុន​ នៅ​ពេល​​រថយន្ដ​មួយ​គ្រឿង​បែក​កង់​ ហើយ​បាន​ទៅ​បុក​ជាមួយ​រថយន្ដ​ក្រុង​មួយ​គ្រឿង​របស់ក្រុម​ហ៊ុនកាពីតូល​។ ក្រុម​ហ៊ុន​នេះ​ក៏មាន​ការ​ពាក់​ព័ន្ធ​នៅ​ក្នុង​ការ​បុក​ធ្វើ​ឲ្យ​មនុស្ស​ស្លាប់​ កាលពី​ខែ​មុន នៅ​ពេល​ដែល​រថ​យន្ដ​ក្រុងមួយ​គ្រឿង​ក្នុង​ចំណោម​រថយន្ដ​ក្រុង​របស់​ក្រុមហ៊ុន​នេះបាន​បុក​អ្នក​ថ្មើរ​ជើង​ម្នាក់​នៅ​ក្នុង​ខេត្ត​បាត់ដំបងហើយ​រដ្ឋាភិបាល​បាន​កំណត់​ថា ជា​ក្រុមហ៊ុនមួយ ​ដែល​ជួប​គ្រោះ​​ថ្នាក​់​បំផុត​នៅក្នុង​ប្រទេស៕ ប្រែ​សម្រួល​ដោយ ចេវប៊ុននី

នៅ​ពេល​យុវជន​ត្រៀម​បោះ​ឆ្នោត​ នោះ​ពួកគេ​នឹង​មាន​ការ​ជាប់​ពាក់​ព័ន្ធ​ក្នុង​នយោបាយ​

នៅ​ថ្ងៃ​អាទិត្យនេះយុវជន​រាប់​មុឺន​នាក់នឹង​​មាន​ឱកាស​បោះ​ឆ្នោត​ជាលើក​ដំបូង​នៅ​ក្នុង​ជីវិត​របស់​ខ្លួន​។ យុវជន​ដែល​ត្រូវ​បោះ​ឆ្នោត​ទាំង​នោះ ទើបគ្រប់អាយុបោះ​ឆ្នោត​  ហើយ​ពួកគេ​មាន​សារៈសំខាន់​ក្នុង​ការផ្លាស់​ប្ដូរ​។ ពួកគេ​ទំនងជា​មិន​ធ្វើ​តាម​អ្នក​ជំនាន់​មុន​​ទេ ដោយ​សារតែ​ពួកគេភាគ​ច្រើន​ចង់​លុប​បំបាត់​​ខ្សែ​បក្ស​របស់​គ្រួសារ​។ ប៉ុន្ដែប្រសិន​បើ​ទ្រឹស្ដី​នយោបាយ​ខុស​នោះតើវានឹង​ក្លាយ​ជា​អ្វី​ទៅ​?នៅពេល​អ្នក​ធ្វើ​យុទ្ធនាការ​ឃោសនា​បោះ​ឆ្នោត​មក​ពី​គណ​បក្ស​ទាំង​អស់​ប្រមូល​ផ្ដុំ​យុវជន ​ដែល​មាន​សិទ្ធិ​បោះ​ឆ្នោត​មុន​ការ​បោះ​ឆ្នោត​ឃុំ​-សង្កាត់​នៅ​ថ្ងៃ​អាទិត្យ​នេះអ្នក​សង្កេត​ការណ៍​នយោបាយ​មាន​ចម្ងល់​ថា តើ​វាមាន​ភាព​ខុស​ប្លែក​គ្នា​ច្រើន​ ឬយ៉ាងណា​។ លោក​ អ៊ា សុផល ជំនាញការសេដ្នកិច្ច​នយោ​បាយបាន​មាន​ប្រសាសន៍ថា “ ខណៈ​ដែល​ប្រជាពល​រដ្ឋ​ជាច្រើន​នាក់សង្ឃឹមថា​ ការ​ផ្លាស់​ប្ដូរ​ផ្នែក​ប្រជា​សាស្ត្រ​នឹង​នាំ​ឲ្យ​មាន​ការ​ផ្លាស់​ប្ដូរ​ក្នុង​ការបោះ​ឆ្នោត​នោះ ក្ដី​សង្ឃឹម​នេះ​មិន​អាច​ទៅ​រួច​ឡើយ”។ លោក​ សុផល ដែល​ទទួល​សញ្ញា​បត្រ​ថ្នាក់​បណ្ឌិត​ពី​សាកល​វិទ្យាល័យប៊ើឃើៃលី (Berkeley) ក្នុងរដ្ឋកាលីហ្វ័រញ៉ និង​បាន​ចំណាយពេល​ច្រើន​ឆ្នាំ​ក្នុង​ការ​ស្រាវ​ជ្រាវ​ផ្នែក​នយោ​បាយ​កម្ពុជាបាន​មាន​ប្រសាសន៍ថា “ ប្រជា​សាស្ត្រ​ នគរូបនីយកម្ម​ ការ​ចាប់​យក​ដី​ និង​វិវាទ​ និង​ការ​បង្ក្រាប​ តើមាន​អ្វី​ថ្មី​ទៅ​?។ លោក​បាន​មាន​ប្រសាសន៍ថា “មែន​ហើយ ​មាន​អ្នក​បោះ​ឆ្នោត​ច្រើន​ជាង​មុនមែន ក៏ប៉ុន្ដែ​​ពួកគេ​កំពុង​តែ​ប្រែ​ក្លាយ​ទៅ​ជា​ប្រព័ន្ធ​មួយ​ ដែលក្នុង​រយៈ​ពេល​២៧​ឆ្នាំ​មកនេះអ្វីៗពាក់​ព័ន្ធនឹងនយោបាយ​ដូចគ្នាដដែល​”។ លោក​បន្ថែម​ថា “ ប្រសិន​បើ​​ខ្ញុំ​អាយុ​១៨​ឆ្នាំខ្ញុំ​បារម្ភ​អំពី​ការ​ប្រកួត​ប្រជែង​កាន់​តែ​ខ្លាំងឡើង នៅ ក្នុង​ទី​ផ្សារ​ការងារ ដើម្បីរកចំណូលជួយ​ក្រុម​គ្រួសារ​​របស់​ខ្ញុំ​ និង​រក​ជំនាញ​ឲ្យសមស្របទៅ​តាម​សេដ្ឋ​កិច្ច​ពិភពលោក​។ ការ​បោះ​ឆ្នោត​ឃុំ-សង្កាត់​ មិន​សំខាន់​នៅ​ក្នុង​គំនិត​របស់​ខ្ញុំ​ទេ”។ប្រជា​ពល​រដ្ឋ​ជាង​ពីរភាគ​បី​អាយុក្រោម​​៣០​ឆ្នាំ​ ក៏ប៉ុន្ដែ​ ការពាក់​ព័ន្ធ​នឹង​នយោ​បាយ​ស្ថិត​នៅឆ្ងាយ​ពី​អាទិភាព​សម្រាប់​ពួកគេ​ក្នុង​ប៉ុន្មាន​ឆ្នាំ​នេះ។ ក្នុងការ​ស្ទង់​មតិ​របស់​អង្គការ​ UNDP ដែល​​ចេញផ្សាយ ​កាលពីពេលថ្មីៗនេះ​ឲ្យដឹង​ថា៦០ភាគ​រយ​នៃ​អ្នក​មាន​អាយុ​ពី​១៥​ឆ្នាំ​ទៅ​២៤​ឆ្នាំ បានលើក​ឡើង​ថា ពួក​គេ​មិន​យល់​ស្របអំពី​អ្នក​ទាំង​ឡាយ​ណា​ ដែល​បាន​សាក​សួរ​អំពី​ការ​ដឹកនាំ​នៅ​ក្នុង​ប្រទេស​ រីឯ​ជាង​៤០​ភាគ​រយ​នៃ​បុរស​ និង​៣៥​​ភាគរយ​នៃ​ស្ត្រី​គិត​ថា ខ្លួន​មិន​ចាប់​អារម្មណ៍​ក្នុង​រឿង​នយោបាយ​ឡើយ​។ ហេតុផល​ទាំង​នេះ គឺ​ផ្សេង​ៗគ្នា​។ ការ​បញ្ចេញ​ទស្សននយោបាយ ​ត្រូវ​បាន​ហាម​ប្រា​ម​នៅ​តាម​សាលារៀន​ រីឯ​យន្ដការ​នយោ​បាយ​តឹង​រុឹង​របស់​គណ​បក្ស​ប្រជាជន​កម្ពុជា​ ដែល​គ្រប់​គ្រង​អំណាច​យូរ​មក​ហើយ​នោះ មាន​ន័យ​ថា យុវជន​ត្រូវ​បាន​ណែនាំ​ឲ្យ​ស្គាល់អំពី​ចំណុច​ជា​ច្រើន​របស់​គណ​បក្ស​គ្រប់​គ្រង​ក្នុង​វ័យ​យុវជន តាមរយៈសមាគមយុវជន​កាយរិទ្ធ​និងយុវជន​កាក​បាទ​ក្រហមជា​ដើម។អ្នកស្រីឡូរ៉ាថនតុន (Laura Thornton) នាយិកា​ ​វិទ្យាស្ថាន​ជាតិ​ប្រជា​ធិបតេយ្យប្រចាំ​ប្រទេស​កម្ពុជា បានលើក​ឡើង​នៅ​ក្នុង​អុីម៉េល​មួយ​កាលពី​ម្សិល​មិញ​ថា “ ខ្ញុំ​គិត​ថា ក្នុង​ប្រទេស​កម្ពុជាយុវជន​ទាំង​ឡាយ​ទំនង​ជា​មិន​សូវ​ចាប់​អារម្មណ៍​នឹង​នយោ​បាយ​ទេ ដូច្នេះ ក្នុង​នោះ​ដែរ ដោយសារមាន​ការ​ហាម​ប្រាម​មិនឲ្យធ្វើ​សកម្ម​ភាព​នយោបាយ​នៅ​តាម​សាលា​រៀន​។ល។”។ យុវជន​ជាច្រើន​នាក់ ដែល​ត្រូវ​បាន​សម្ភាស​​នៅ​សប្ដាហ៍នេះចាប់​អារម្មណ៍​នឹង​រឿង​នយោ​បាយខ្លះដែរ។ចាប់​ពី​កម្ម​ករ​កាត់​ដេររហូត​ដល់​និស្សិត​សាកល​វិទ្យា​ល័យ ភាគ​ច្រើន​និយាយ​ថាពួកគេ​​មាន​បំណង​ទៅ​បោះ​ឆ្នោត​ ប៉ុន្ដែ គ្មាន​នរណា​ម្នាក់​ពិភាក្សា​អំពីរឿង​គណ​បក្សឬនយោបាយ​ឡើយ។ពួកគេ​ជជែកតែ​អំពី​ការងារ​ និង​ការ​ប្រកប​របរ​រក​ស៊ី​ចិញ្ចឹម​ជីវិតប៉ុណ្ណោះ។ លោកវង់សុវណ្ណនីជា​អាជីវករ​អាយុ​២៤ឆ្នាំ​ នៅ​ក​្នុង​រាជ​ធានី​ភ្នំ​ពេញ​បាន​លើក​ឡើង​ថា"ខ្ញុំ​ចង់​បាន​ចៅ​សង្កាត់​ថ្មី​ម្នាក់​ ដែល​អាច​បញ្ចុះ​តម្លៃ​ផលិត​ផល​ និង​បញ្ចុះ​ពន្ធ​”។ លោក​បាន​លើក​ឡើង​ថា លោក​មាន​បំណង​ត្រឡប់​ទៅ​ខេត្ត​កណ្ដាល​ជា​ស្រុក​កំណើត​របស់លោកដើម្បី​បោះ​ឆ្នោត​នៅ​ថ្ងៃ​អាទិត្យ​នេះ។លោក​ សុវណ្ណនីបាន​បន្ថែម​ថា “ បច្ចុប្បន្ននេះខ្ញុំ​មាន​ប្រាក់ចំណូល​ទាប។ វាពិបាក​ណាស់​សម្រាប់​ខ្ញុំ​ក្នុង​ការ​រស់​នៅ​ ពី​ព្រោះ​ទំនិញ​ថ្លៃ​ណាស់”។អ្នក​ផ្សេង​ទៀត​បាន​​បន្ទរ​ចំពោះ​ការ​បារម្ភ​ដូច​គ្នា​នេះ​ដែរ។ យុវជនបា៉ងដារិទ្ធអាយុ​២១​ឆ្នាំជានិស្សិត​​ផ្នែក​វិស្វកម្ម​នៅ​សាកល​វិទ្យា​ល័យ​ន័រតុន និង​មានស្រុកកំណើតនៅខេត្ត​កំពង់ចាម ​លើក​ឡើង​ថា “ បច្ចុប្បន្ននេះខ្ញុំ​បារម្ភថានៅ​ពេល​​ខ្ញុំ​​បញ្ចប់​ការ​សិក្សារបស់​ខ្ញុំ​ ខ្ញុំមិន​អាច​ស្វែង​រក​ការងារ​បាន ពីព្រោះពួកគេ​រើស​យក​តែ​សាច់​ញាតិ​របស់​ពួកគេ និង​សមា​ជិក​ក្រុម​របស់​ពួកគេ​”។ យុវជន​ ដែល​មាន​សិទ្ធិ​បោះ​​ឆ្នោត​ទំនង​ជា​ពេញ​ចិត្ត​ចំពោះ​អ្នក​ទាំង​ឡាយ​ណា​ ដែល​អាច​ជួយពួកគេ​ឲ្យទទួលបាន​អនា​គត​ល្អ​ប្រសើរ​មួយ។ ដូច្នេះ គណ​បក្ស​ទាំង​ឡាយ​កំពុង​តែ​ផ្ដោត​ទៅ​លើ​យុវជន​ ដែល​មាន​​សិទ្ធិ​បោះ​ឆ្នោត​។ គណ​បក្ស​ប្រជា​ជន​កម្ពុជា បាន​ទទួល​ស្វាគមន៍​អ្នក​ផ្ដាច់​ខ្លួន​ជាច្រើន​នៅ​ក្នុង​ពិធី​របស់​គណ​បក្ស​ ចំណែក​ឯ​គណ​បក្ស​សម រង្ស៊ី បានសន្យា​​ក្នុងពេល​ធ្វើយុទ្ធនាការ​ឃោសនាបោះឆ្នោតនេះថា​ នឹងស្វែង​រក​ការ​ងារ​ឲ្យ​យុវជន។ គណ​បក្ស​សិទ្ធិមនុស្ស គណ​បក្ស​ហ្វុ៊ន​ស៊ិ​ន​បុិច និង​គណ​បក្ស​ នរោត្តមរណឫទ្ធិ បាន​ផ្ដួច​ផ្ដើម​អំឡុង​ឆ្នាំ​មុន​ៗ ដើម្បី​ទាក់​ទាញ​ការ​គាំ​ទ្រ​នៅ​ក្នុង​ចំណោម​យុវជន​ហើយ​បាន​លើក​ឡើង​ថា ពួកគេ​បាន​រាប់បញ្ចូល​យុវជន​នៅ​ក្នុង​ចំណោម​ក្រុម​អ្នក​បោះ​ឆ្នោត​ដ៏សំខាន់​បំផុត។ លោក​ស្រីជា​ វណ្ណាតអ្នក​វិភាគ​នយោ​បាយ​​បាន​មាន​ប្រសាសន៍ថា “ ដោយ​សារ​តែ​​ចំនួន​ភាគ​ច្រើន​នៃយុវជន​ គ្រប់​គណ​បក្ស​ទាំង​អស់បាន​ព្យាយាម​ទាក់ទាញអ្នក​បោះ​ឆ្នោត​ថ្មី​ជា​លើក​ដំបូង​”។លោក​ស្រី​បាន​លើក​ឡើង​ថា “ វាជា​ការ​គួរឲ្យ​ចាប់​អារម្មណ៍ ​និងរង់ចាំមើលលទ្ធផល​នៃ​ការ​បោះ​ឆ្នោត​ឃុំ-សង្កាត់​ ដើម្បីឲ្យដឹងថាតើ​អ្នក​បោះ​ឆ្នោត​ពេញ​ចិត្ត​នឹង​សេវា​សាធា​រណៈ​របស់​អាជ្ញា​ធរ​មូល​ដ្ឋាន​ ឱកាស​ស្វែង​រក​ការ​ងារ​ធ្វើ ទស្សន​វិស័យ​សម្រាប់​អនា​គត​របស់​ខ្លួន​យ៉ាងណានោះ”៕ ប្រែសម្រួល​ដោយ ចេវប៊ុននី  

តម្លៃ​ប្រេង​សាំង​ធ្លាក់​ចុះ​​​១២,៦​ភាគ​រយ​តាម​ប្រេង​លើ​ទី​ផ្សារ​អន្តរជាតិ​​

ការ​ធ្លាក់​ចុះ​​តម្លៃ​ប្រេង​ឥន្ធ​ននៅ​លើ​ទី​ផ្សារ​អន្តរជាតិ​ចាប់​តាំង​ពី​ខែ​មីនា​មក​ បាន​ធ្វើ​ឲ្យតម្លៃ​ប្រេង​សាំង​នៅ​​តាម​ស្ថានីយ​ប្រេង​ឥន្ធន​ក្នុង​រាជ​​ធានី​ភ្នំ​ពេញ​​​កាល​ពី​ម្សិល​មិញ​ធ្លាក់​ចុះចំនួន​១២,៦​ភាគ​រយ​ គឺ​ចុះ​មក​នៅ​ត្រឹម​៥.២០០រៀល​ក្នុង​មួយ​លីត្រ​ ស្មើ​នឹង​(១,៣០​ដុល្លារ)​។លោក​យឹម​ វិបុល​ ប្រធាន​គ្រប់​គ្រង​ទីផ្សារ​នៅ​ក្រុម​ហ៊ុន​ប្រេង​ Total Cambodge​ បាន​ឲ្យ​ដឹង​ថា​ ការយក​ពន្ធ​ដូច​គ្នា​មិន​ចំពោះ​ថា​​ មាន​ការ​នាំ​ប្រេងចំនួន​​ប៉ុន្មាន​នោះ ​មាន​ន័យ​ថា​ តម្លៃ​ប្រេង​សាំង​​ក្នុង​ស្រុក​ អាស្រ័យ​លើ​តម្លៃ​ប្រេង​នៅ​លើ​ទី​ផ្សារ​អន្តរ​ជាតិ​ស្ទើរ​តែ​ទាំង​ស្រុង។​  លោក​បាន​និយាយ​ថា​ “​ប្រសិន​បើ​ទី​ផ្សារ​នៅ​លើ​ពិ​ភព​លោក​លក់​ប្រេង​សាំង​ក្នុង​តម្លៃ​ទាបនោះ​យើង​ក៏​លក់​ប្រេង​សាំង​ក្នុង​តម្លៃ​ទាប​ដែរ”។​ កាល​ពី​ខែ​មីនា​ ប្រេង​ឆៅ​នៅ​បុរី​ញូវ​ យ៉ក​ ត្រូវ​បាន​លក់​ចេញ​ក្នុង​តម្លៃ​រហូត​ដល់​១១៣,៦០​ដុល្លារ​ក្នុង​មួយ​បារ៉ែល​ ក៏ប៉ុន្តែ​កាល​ពី​ថ្ងៃ​ច័ន្ទតម្លៃ​ប្រេងឆៅ​បាន​ចុះ​មក​ត្រឹម​ចំនួន​៩១,៣៦​ដុល្លារ​ក្នុង​មួយ​បារ៉ែល។​ លោក​ យឹម​ វិបុល​ បាន​បន្ត​ទៀត​ថា​ ទោះ​បី​ជា​តម្លៃ​ប្រេង​ចុះ​ក៏​ដោយ​ ក៏​តម្លៃ​ប្រេង​សាំង​នៅ​​ប្រទេស​កម្ពុជានៅ​តែ​ខ្ពស់​ ដោយ​សារ​តែ​ពន្ធ​នាំ​ចូល​ខ្ពស់។​ លោក​ បាន​និយាយ​ថា​ “​ ប្រសិន​បើ​រដ្ឋាភិ​​បាល​អាច​កាត់​បន្ថយ​ពន្ធ​ប្រេង​បាន​ នោះ​ក្រុម​ហ៊ុន​ប្រេង​ទាំង​អស់​នឹង​អាច​លក់​ប្រេង​សាំង​បាន​ក្នុង​តម្លៃ​ទាប​ដែរ”។​ ធនាគារ​ពិភព​លោក​​បាន​លើក​ឡើង​ កាល​ពី​សប្តាហ៍​មុន​ថា​ ការ​កាត់​បន្ថយ​ពន្ធ​នាំ​ចូល​ប្រេង​ ​ផ្តល់​ផល​ប្រយោជន៍​ឲ្យ​តែ​គ្រួសារ​ ​​ដែលមាន​ប្រាក់​​ចំណូល​​ខ្ពស់​ប៉ុណ្ណោះ​ដោយ​សារ​​​គ្រួសារ​មានប្រាក់ចំណូល​ខ្ពស់​​ ប្រើ​ប្រេង​ច្រើន​ជាង​​​គ្រួសារ​មាន​ប្រាក់​ចំណូល​ទាបដល់​ទៅ​១៥​ដង៕ ប្រែ​សម្រួល​ដោយ​ ហួង​ កុក​ទៀន

រថយន្ត​​​ក្រុង​​​ និង​រថយន្តដឹកទំនិញ​នឹង​​រត់​ដោយ​ផ្ទាល់​​​រវាង​​​​រាជធានីភ្នំ​​​ពេញ​​​​និង​ទីក្រុង​​​បាងកក

មន្ត្រីម្នាក់​​​បាន​​​និយាយ​​​កាល​​​ពីម្សិល​​​មិញថា​​​ចាប់ពី​​​ខែក្រោយ​​​ទៅ រថយន្ត​​​ក្រុង​​​និង​​​រថយន្ត​ដឹក​​​ទំនិញ​​​របស់​​​កម្ពុជា​​​និង​​​ថៃ ចំនួន​​​៨០​​​គ្រឿង​​​នឹងត្រូវ​​​អនុញ្ញាតឲ្យ​​​ដឹក​​ទំនិញ និង​​​អ្នកដំណើរ​ដោយ​ផ្ទាល់​រវាង​​​​រាជធានី​​​​ភ្នំពេញ​​​ និង​​​ទី​​​ក្រុង​​​បាង​​​កក ​​​ជា​លើក​ដំបូង​​​។ លោក​​​ សួន វ៉ាន់​​​ហុង​​​ អនុប្រធាន​​​​​​នាយក​ដ្ឋាន​ដឹក​​​ជញ្ជូន​​​នៅ​​​ក្រសួង​​​សាធា​​​រណការ​​​និង​​​ដឹកជញ្ជូន​​​បាន​​​មាន​​​ប្រសាសន៍​ថា ​​​ចាប់ពី​ថ្ងៃទី​១៤ ​​​ខែមិថុនា​​​ទៅ​​​ រថយន្ត​​​ក្រុង​​​​​​ចំនួន​​​៣០​គ្រឿង​​​​និងរថយន្តដឹកទំនិញ​​​១០គ្រឿង​​​របស់​​​កម្ពុជា​​​នឹង​​​ត្រូវ​​​បាន​​​អនុញ្ញាតឲ្យ​​​​​​ធ្វើដំណើរ​​​ធ្លង​​​កាត់​​​​ច្រក​​​ទ្វារ​ព្រំ​ដែន​​អន្តរជាតិ​​​ប៉ោយប៉ែត​​​។ ​លោក បានថ្លែងថា​​​ រថយន្ដ​​​ក្រុងចំនួន​​​១០គ្រឿង ​​​និង​​​រថយន្ត​​​ដឹក​​​ទំនិញ​​​៣០គ្រឿង​​​របស់​​​ប្រទេស​ថៃ​​​ក៏នឹង​​​អនុញ្ញាតឲ្យ​​​ឆ្លង​​​កាត់​​​ច្រក​​ទ្វារ​​នេះដែរ។ រហូតមក​​​ដល់​​​ពេលនេះ​​​ អ្នកដំណើរ​​​និង​​​ទំនិញ​​​ត្រូវ​​​ប្តូរ​​​រថយន្ត​​​នៅ​​​ច្រក​​​ព្រំដែន​​​នេះ។លោក​​​បាន​​​មាន​​​ប្រសាសន៍ថា “​​​នេះគឺ​​​ជា​​​ការ​​​ដឹក​​​ជញ្ជូន​​​តាម​​​ជើង​​​គោក​​​​​លើក​​​ដំបូង​ពី​​រាជ​​​ធានី​​​ភ្នំពេញ​​​​​ឆ្ពោះទៅ​​​ទីក្រុង​​​បាង​​​កក”។លោក​​មាន​​​ប្រសាសន៍បន្ថែមថា ​​​រថយន្ត​ក្រុង​​​ទាំង​​​នោះ​​​នឹង​​​មិន​​​ធ្វើដំណើរ​​​ឆ្លង​​​កាត់ច្រក​​​ព្រំ​​​ដែន​​​ខេត្ត​​​កោះកុង​​​ទេ​​ពេលនេះ​​។ លោក វ៉ាន់ហុង ​​​បាន​​​មាន​​​ប្រសាសន៍​​​ថា​​​កម្ពុជា​​​បាន​​​ចុះកិច្ច​​​ព្រមព្រៀង​​​ស្រដៀង​​​គ្នា​នេះ​​​ដែរ​​​ជា​​​មួយ​​​ប្រទេស​​​វៀតណាម កាល​​​ពី​​​ឆ្នាំ​​​២០០៧​​​ ហើយ​​​ថា នៅ​​​ពេល​​​នេះ​​​មាន​​​រថយន្ត​​​ក្រុង​​​និង​​​រថយន្ត​​​ដឹកទំនិញ​​​កម្ពុជា​​​ចំនួន​​​៣០០គ្រឿង​​​​បើក​បរ​ចូល​​​​ប្រទេស​​​វៀត​ណាម​​​​និងមាន​​​រថយន្ត​​​ក្រុង​​​និង​​​រថយន្ត​​​ដឹក​​​ទំនិញ​​​វៀតណាម​​​ចំនួន​​​៣០០​​​គ្រឿង​​​ដែរ បើក​បរ​ចូល​​​មក​​​ប្រទេស​​​កម្ពុជា​​​។​​​ ប្រទេសឡាវ​​​និង​​​ប្រទេសកម្ពុជា​​​ក៏បាន​​​ចុះ​​​កិច្ច​​​ព្រម​​​ព្រៀង​​​​ស្រដៀង​គ្នានេះ​​​ដែរ​​​កាលពី​​​ឆ្នាំ​​​២០០៩ ​ដែល​​​ក្នុង​​​នោះ​​​ រថយន្តក្រុង​​​កម្ពុជា​​​ចំនួន​​​៤០​គ្រឿង ​​​ត្រូវ​​​បាន​​​ផ្ដល់​​​អាជ្ញាប័ណ្ណ​​​ឲ្យ​​​​បើក​បរ​ចូល​​​ប្រទេស​​​ឡាវ​​​ ក៏ប៉ុន្តែ​នៅ​ពេល​បច្ចុប្បន្ន​នេះ​​​មានតែ​រថយន្តក្រុង​​​មួយគ្រឿង​​​​ប៉ុណ្ណោះ​រត់​​​​រវាង​​​ប្រទេសទាំង​​​ពីរ​​​។ លោក​​​ វ៉ាន់ហុង ​​​បានមានប្រសាសន៍​​​ថា​លោក​​​បានអញ្ជើញ​​​ក្រុមហ៊ុនដឹក​​​ទំនិញ​​​​​​និង​​​ក្រុមហ៊ុន​​​រថយន្ត​ក្រុងនានា​​​ឲ្យដាក់​​​ពាក្យ​​​សំុ​អាជ្ញា​​​​​​​​​​​​​​​​​​ប័ណ្ណ​​​ធ្វើ​ប្រតិបត្តិការ​​​ឆ្លង​​​កាត់​​​ច្រក​​​ព្រំដែន​កម្ពុជា-ថៃ​​​។​​​ លោក​​​បានមាន​​​ប្រសាសន៍ថា “យើង​​​នឹង​​​រៀបចំ​​​កិច្ចប្រជំុមួយ​​​នៅ​​​ឯក្រសួង​​​សាធារណការ​​​​និង​​​ដឹកជញ្ជូន​​​នៅថ្ងៃ​​​ទី៤​​​ ខែមិថុនា​​​ ដើម្បី​​​សម្រេច​​​”ថា ​​​តើ​​​ក្រុមហ៊ុនណា​​​ខ្លះ​​​ដែលត្រូវ​​​ផ្តល់អាជ្ញាប័ណ្ណឲ្យ​​​។ លោក​​​​​​បន្ថែមថា“យើង​​​នឹងជ្រើសរើស​​​​ក្រុមហ៊ុន​​​ណា  ​​ដែលមិន​ធ្លាប់​មាន​​​គ្រោះថ្នាក់​​​ចរាចរណ៍​​​និង​មាន​​​​សុវត្ថិភាព​​​​សម្រាប់​អ្នក​​​ដំណើរ​​​"។ លោក ​​​ចាន់​​​ សុផាន់ណា​​​ អ្នកគ្រប់គ្រង​​​ក្រុម​​​ហ៊ុន​​​ដឹកជញ្ជូន​​​ភ្នំពេញសូរិយា បាន​​​មាន​​​ប្រសាសន៍​​​ថា​​ ក្រុមហ៊ុន​​​របស់​​​លោក​​​បាន​​​ស្នើសំុឲ្យ​ក្រសួង​​​ផ្ដល់អាជ្ញាប័ណ្ណ​​​​​​ឲ្យ​ខ្លួន​ដើម្បី​​​ដំណើរការ​​​រថយន្តក្រុង​​​ចំនួន១០​​​គ្រឿង​​​ឆ្លងកាត​​​់ព្រំដែន​​​។ លោក សុផាន់​ណា បាន​​​មាន​​​ប្រសា​​​សន៍​​​ថា​​​ “យើង​ត្រៀម​​​​រថយន្តក្រុង​​​ចំនួន​​​​​​១០​គ្រឿង ប៉ុន្តែយើង​​​មិន​​​ទាន់​​​ដឹង​​​នៅ​​​ឡើយ​​​ទេ​​​ថា​​​ តើក្រសួង​​​នឹង​​​ឲ្យយើង​​​​​​ប៉ុន្មាន​​​គ្រឿង​​​​​​​”។ លោក​​​បាន​​​បន្ថែម​​​ថា​​​ សំបុត្រ​​​រថយន្ត​ក្រុង​​​នឹង​​​មាន​​​តម្លៃ​​​​ចន្លោះពី​​​២៥ដុល្លារ​​​ទៅ​​​៣០​ដុល្លារ​​​​មួ​​យជើង​​​។ លោក​​​បន្តថា​​​“តម្លៃ​នេះ​​​ខ្ពស់​​​ជាង​តម្លៃ​​​សំបុត្រ​​​ទៅកាន់​​​ប្រទេស​​​វៀត​ណាម ឬឡាវ​​​ដោយ​​​សារ​​​ចម្ងាយផ្លូវ​​​ឆ្ងាយ​ជាង​​​ ហើយ​​​​​​ត្រូវ​​​បង់ប្រាក់​​ច្រើន​​​ទៀត​សម្រាប់​​​អ្នក​​​ដំណើរ​​​​​​ម្នាក់ៗ​​នៅ​ច្រក​ព្រំដែន​េនះ​​​”៕ ប្រែសម្រួលដោយ ហម​​​ សុផាណ្ណា​​​​​​​​​

ព្រះ​អង្គ​ម្ចាស់​ នរោត្តម​ រណឫទ្ធិ ​ចង់​ឲ្យ​អ្នក​ផ្តាច់​ខ្លួន​វិល​ត្រឡប់​មក​ចូលរួម​ជា​មួយ​អ្នក​រាជានិយម

ព្រះអង្គម្ចាស់ នរោត្តម​ រណឫទ្ធិ​ បាន​ឡាយ​ព្រះ​លិខិត​ទៅ​កាន់​សមា​​ជិក​សមា​ជិកា​នៃ​គណបក្ស​ហ៊្វុន​សិុន​ប៉ិច​ និង​គណបក្ស​របស់​ព្រះ​អង្គ​ផ្ទាល់​គឺ​គណបក្ស​ នរោត្តម ​រណឫទ្ធិ​ ដោយ​ព្រះ​អង្គ​​ជំរុញ​​ឲ្យ​ពួក​គេ​លើក​ទឹកចិត្ត​អ្នក​ផ្តាច់​ខ្លួនទៅ​ចូល​រួម​​គណបក្ស​សមរង្សុី​ និង​គណបក្ស​សិទ្ធិ​មនុស្ស​​ ឲ្យ​ត្រ​ឡប់​មក​ចូល​រួម​នឹង​គណបក្ស​ នរោត្តម​ រណឫទ្ធិ​និង​គណបក្ស​ហ៊្វុនស៊ិន​ប៉ិច​ ដែលទើប​​បាន​បញ្ចូល​គ្នាវិញ​នា​ពេល​​ថ្មីៗ​នេះ​។ ព្រះ​អង្គ​បាន​ឡាយ​ព្រះ​​លិខិត​នោះ​បន្ទាប់​ពី​ព្រះ​អង្គ​ម្ចាស់​ នរោត្តម ​រណឫទ្ធិ ​និង​​លោក ​ញឹក​ ប៊ុន​ឆៃ​ ប្រ​ធាន​ប្រតិបត្តិ​គណបក្ស​ហ៊្វុន​ស៊ិន​ប៉ិចដែល​បាន​ដឹក​នាំ​គណបក្ស​រាជា​និយម​​បន្ទាប់​ពី​ព្រះ​អង្គ​ត្រូវ​បាន​​គេ​បណ្តេញ​ចេញ​ពី​​ប្រធានគណ​​បក្ស​ហ៊្វុន​ស៊ិន​ប៉ិច​កាល​ពី​ឆ្នាំ​២០០៦  ​បាន​​ប្រកាស​កាល​ពី​ថ្ងៃព្រហស្បតិ៍ថា​ គណបក្សទាំង​ពី​រនឹង​រួម​បញ្ចូល​គ្នា​ក្រោម​ផ្លាក​គណបក្ស​ហ៊្វុន​ស៊ិន​ប៉ិច​ តែមួយ​។ ព្រះ​អង្គ​ម្ចាស់​ រណឫទ្ធិ ​បាន​ឡាយ​​លិខិត​​ចុះ​កាល​បរិច្ឆេទ​​ថ្ងៃ​ច័ន្ទ​ថា​ “​​ជា​​បឋម ខ្ញុំ​សូមថ្លែងនូវ​​អំ​ណរគុណ​យ៉ាង​ជ្រាល​ជ្រៅប្រកប​ដោយ​​កតញ្ញូតា​ធម៌ចំពោះ​ការគាំទ្រ​មក​លើ​រូបខ្ញុំ​តាំង​ពី​អតីតកាល ​​​បច្ចុប្បន្នកាល ​ជា​ពិសេស​ការ​គាំ​ទ្រ​ខ្ញុំ​នា​​ពេល​អនាគតកាល ​ដែល​ខ្ញុំ​នឹង​វិល​ត្រឡប់​ទៅ​ដឹក​នាំ​គណបក្ស​ហ៊្វុន​ស៊ិន​ប៉ិច ​វិញ​ដែល​​ព្រះ​ករុណា ​ព្រះ​មហា​វីរក្សត្រ​ សម្តេច​ឳ​ សម្តេច​តា​​ សម្តេច​តាទួត​ ទ្រង់​បាន​ប្រោស​ព្រះ​រាជ​​ប្រទានមក​ឲ្យ​រូប​ខ្ញុំ​តាំង​តែ​ពី​ឆ្នាំ​១៩៩១​”។ ព្រះ​អង្គ​បាន​មាន​ព្រះ​រាជ​បន្ទូល​ថា​ “ ​ក្នុង​នាម​យើង​​ជា​អ្នក​រាជា​និយម​ យើង​មាន​​កាតព្វ​កិច្ចចូល​រួម​ប្រមែ​​ប្រមូល​​​​ និង​ពង្រឹង​ គណបក្ស​រាជា​និយម​ទាំង​ពីរ​ ​គឺ​គណបក្ស​ នរោត្តម​ រណ​ឫទ្ធិ​និង​គណបក្ស​ហ៊្វុន​ស៊ិន​ប៉ិច​”។ ព្រះអង្គ​មាន​បន្ទូលទៀត​ថា​​ “គណ​​បក្ស​​ទាំង​ពីរ​ឥឡូវ​នេះ​មាន​​ “នយោបាយ​​រួមតែ​មួយគត់​​ គឺ​ដើម្បី​ប្រ​មែ​ប្រមូល​កម្លាំងនោះឲ្យ​ក្លាយ​ទៅ​ជា​កម្លាំង​មួយ​ ដែល​មាន​សក្តានុពល​ដើម្បី​ធ្វើ​ការ​ឃោសនារួម​គ្នា​ ប្រមែ​ប្រមូល​កម្លាំង​​ដែល​បាន​ចាក​ចេញ​ពីគណ​​បក្សយើង​ទាំង​ពីរ​​ទៅ​ចូល​ជាមួយ​គណបក្ស​ សម រង្សុី​ ​និង​គណបក្ស​សិទ្ធិ​មនុស្ស​របស់​លោក  កឹម​ សុខា​​​​ឲ្យ​បាន​ជោគ​ជ័យ​ជា​អតិបរមា​ក្នុង​ការ​បោះ​ឆ្នោត​ឃុំ-​សង្កាត់​ថ្ងៃ​ទី​៣ ​ខែ​មិថុនា ​ឆ្នាំ​២០១២​ខាង​មុខ​នេះ។ នៅ​ក្នុង​លិខិត​របស់​ព្រះ​អង្គ​ គេ​កត់សម្គាល់​​ឃើញ​ថា ព្រះ​អង្គ​មិន​បាន​គូស​បញ្ជាក់​ពី​​ការ​ព្យាយាម​បញ្ចុះ​បញ្ចូល​អ្នក​​ផ្ដាច់​ខ្លួន​ចេញពី​គណបក្ស​រាជានិយម​ ទៅ​ចូល​គណបក្ស​ប្រជា​ជនកម្ពុជា​​ ដែល​កំពុង​កាន់​អំណាច​របស់​លោក​​នាយក​រដ្ឋមន្ត្រី​...

បក្ស សម រង្ស៊ី ​បញ្ចាំងវីដេ​អូ​​ អំ​ពី​កា​រ​បណ្តេញ​ចេញ​​ អំឡុង ពេល​យុទ្ធ​នាកា​រ​បោះ​ឆ្នោត

ខណៈដែល​គណបក្សប្រជាជន​កម្ពុជា​ចំ​ណា​យ​​ពេល​ច្រើន​ក្នុង​កា​រ​ធ្វើ​យុទ្ធនា​កា​រ​របស់ខ្លួន ដោ​យផ្សព្វផ្សាយ​​សុន្ទរកថា​របស់​លោ​ក​នាយក​រដ្ឋមន្ត្រី កា​រ​ប្រគំតន្ត្រី និងបញ្ជូន​​តារា​កំ​ប្លែ​ង​ល្បីៗទៅ​សម្តែ​ង​ជូន​ទស្សនិក​ជន​នៅ​តាម​​ផ្លូវ គណ​បក្ស​ សមរង្ស៊ីបា​ន​បញ្ចាំង​វី​ដេអូសព្វ​គ្រប់​​។ នៅ​ពេល​ថ្ងៃ​លិចរថ​យន្តចំ​នួ​ន​១០​គ្រឿង​ បា​ន​បើក​បរ​គ្រប់​ផ្លូវ​ក្នុង​រាជ​ធានី​ ដោ​យ​បញ្ចាំ​ង​វី​ដេអូ​ឃ្លីប​នៅ​លើ​ផ្ទាំងក្រណាត់ស ដាក់នៅ​ផ្នែក​ខាង​ក្រោយ​​រថយន្ត​ ដោ​យ​រៀប​រាប់​អំ​ពី​ការប៉ះ​ទង្គិចគ្នា រវាង​អ្នក​ភូមិ ​និង​អាជ្ញាធរ​ នៅក្នុង​វិវាទដី​ធ្លី​ដ៏ចម្រូងចម្រាសមួយចំនួន។ ទស្សនិក​ជន​ដែល​ប្រមូល​ផ្តុំគ្នារាល់​កា​រ​ទស្សនានេះ​ អាចមើលឃើញ​​ថា​ ជា​យុទ្ធ​សាស្ត្រ​​មួយ។ ម្ចាស់​ហា​ងដើេរ​ចេញ​ពី​ហាង​របស់​ខ្លួន​ ចំណែកឯអ្នក​រត់ម៉ូតូ​ឌុប​ឈប់​អែប​តាមចិញ្ចើមផ្លូវ​ ដើម្បី​ទស្សនា​ខ្សែវីដេអូ​នេះ។ សំឡេងចេញពីធុង​បាសមួ​យគូ គឺជា​សម្រែក​ទ្រហោយំរបស់​អ្នក​ស្រុ​ក​បុរីកីឡា​ នៅពេល​ផ្ទះ​របស់ពួកគា​ត់​ ត្រូ​វ​បា​ន​កម្ទេច​ចោលនិង​ក្រុម​អ្នក​តវា៉​បឹង​កក់ស្រែ​ក​ទ្រ​ហោ​យំ​ នៅពេល​នគរបា​ល​កៀរពួ​កគាត់​ចេញ។ អ្នក​​ដើរ​កាត់​មិន​អា​ច​ជួយអ្វី​បា​នទេ ប៉ុន្តែ​បានឈរមើល។ លោកសុនឆ័យសមា​ជិ​ក​រដ្ឋ​សភា​មក​​​ពី​​​គណ​​បក្ស​ សមរង្ស៊ីប្រចាំមណ្ឌល​រាជ​ធានី​ភ្នំពេញបា​ន​មា​ន​ប្រ​សាសន៍កា​ល​ពី​ម្សិល​មិញ​ថា “ ខ្ញុំ​ចាប់​អា​រម្មណ៍​បំ​ផុត ​ចំ​ពោះ​ចំនួន​​​ទស្សនិក​​​ជន​។ ប្រជា​ពល​រដ្ឋ​កំ​ពុង​តែ​ជជែក​អំ​ពីរឿង​នេះហើយ​រៀងរាល់លើកមានពល​រដ្ឋ​កាន់​តែ​ច្រើនចេញ​មកទស្សនា”។ ខ្សែ​វី​ដេអូ​បែប​នេះ​ គ្មានផ្សាយក្នុងស្ថានីយទូរទស្សន៍ ដែល​មា​ន​សម្ពន្ធ​ភាព​ជា​មួយ​រដ្ឋាភិ​បា​ល​នៅ​ក្នុង​ប្រទេ​សនេះ​ទេ។ ដូច្នេះ​ អំឡុង​​យុទ្ធនា​កា​រ​រយៈ​ពេល​១៥ថ្ងៃគណ​​បក្ស សម ​រង្ស៊ី ចំណាយពេល​ប្រ​ហែលបួ​ន​ម៉ោង​ក្នុង​មួ​យ​ថ្ងៃ ដើម្បី​ព្យាយាមរក​វិធី​ដោះ​ស្រាយ​ ដោយ​​ប្រើ​​រថ​យន្ត​ និង​អេក្រង់​ទូ​រ​ទស្សន៍។ លោកសុនឆ័យ​ បា​ន​បន្ត​ថា“គួ​រ​តែ​អនុញ្ញាត​​ឲ្យ​ប្រជា​ពល​រដ្ឋបាន​ទស្សនាអំពី​បញ្ហា​បែប​នេះតាមទូរ​ទស្សន៍​ យ៉ាង​ហោចណាស់​ទស្សនា​​តាមទូរទស្សន៍ជាតិ​ដែរ​។ ព្រឹត្តិកា​រណ៍​នេះ​បា​ន​កើត​ឡើង​ចំ​ពោះ​យើង​ ជាពិ​សេស​ក្នុង​រាជ​ធានី។ប្រសិន​បើ​រដ្ឋាភិ​បា​ល​​គោរព​សិទ្ធិ​ទទួល​​​បាន​ព័ត៌មា​ន​ ដូចចែងក្នុង​​រដ្ឋ​ធម្ម​នុញ្ញ​ ​ទូរទ​​​ស្ស​ន៍​របស់រដ្ឋមានអព្យា​ក្រឹត្យ​ភាព​ យើង​​ប្រហែ​ល​​​ជា​នឹង​បា​ន​ទស្សនាវាតា​ម​ទូ​រទស្សន៍”។ លោក​បាន​បន្ថែម​ថា “ ប៉ុន្តែ យើងបាន​ទស្សនា​​តែ​អ្វី​ៗ​ និយាយអំពីការគាំ​ទ្រ​ចំពោះ​រដ្ឋាភិ​បា​ល​ កា​រ​ឃោសនា​ កា​រ​ចុះ​ចែ​ក​ស្បៀង​អាហា​រ​របស់​រដ្ឋាភិ​បា​ល។នោះ​ហើយ​ជា​​​​មូ​ល​ហេតុ​ដែ​លធ្វើ​ឲ្យខ្សែ​វី​ដេអូ​របស់​យើង​ មា​ន​​​កា​រ​ទាក់​ទាញ”។ លោក សុន ឆ័យ បា​ន​មា​ន​ប្រ​សាសន៍​ថាដោ​យ​សារ​ខ្វះ​មូ​ល​និធិកា​រ​ដាក់​បញ្ចាំង​​វី​ដេអូ​ចល័ត ត្រូ​វ​បា​ន​ប្រើ​ភាគ​ច្រើ​ន​នៅតែក្នុង​រាជ​ធា​នី​ភ្នំ​ពេញប៉ុណ្ណោះ ប៉ុន្តែ​​រថ​យន្ត​ខ្លះ​ត្រូ​វ​បញ្ជូន​ចេញទៅខេត្ត​មួយចំនួន ដូច​ជា​ខេត្ត​តាកែវជា​ដើម ហើយ​ខ្សែ​វី​ដេ​អូ ត្រូ​វ​បា​ន​ដាក់​បញ្ចាំង​នៅ​តា​ម​សហ​គមន៍​តូចៗ។ ថា​តើ​ខ្សែ​វី​ដេអូ​នេះ​សម​ល្ម​ម​នឹង​ទាក់​ទាញ​អ្ន​ក​បោះ​ឆ្នោត​ថ្មី​ឲ្យ​គណ​បក្ស​នេះ​បាន​ឬយ៉ាងណានោះលទ្ធផលនឹងបានដឹងតាមរយៈកា​រ​បោះ​ឆ្នោត​នៅ​ថ្ងៃ​អា​ទិត្យ​នេះ​ហើយ។នៅ​ឯ​ព្រឹត្តិ​កា​រណ​៍​បែ​ប​នេះ កម្រិត​នៃ​កា​រ​ឃោសនា​ឃើញ​ថា ​គណ​បក្ស​ប្រឆាំង​ជាទូ​ទៅមា​ន​ការគាំ​ទ្រ​ច្រើន​នៅ​ក្នុងរាជ​ធានីប៉ុន្តែ​ដោ​យ​​សារ​តែ​កា​រ​បណ្តេញ​ពី​ដីធ្លី​កាន់​តែ​ខ្លាំង​ឡើងក្នុង​រយៈ​ពេល​ប៉ុន្មាន​ឆ្នាំ​នេះ​ ខ្សែ​វីដេអូ​អា​ច​ធ្វើ​ឲ្យ​រំ​ជួ​ល​​ចិត្ត។ លោក គល់ បញ្ញា នាយក​ប្រតិបត្តិ​នៃ​គណៈ​​កម្មាធិ​កា​រ​សម្រាប់​កា​រ​បោះ​ឆ្នោត​ដោ​យ​សេរី​ និង​យុត្តិធម៌ក្នុង​ប្រទេ​ស​កម្ពុជា​ បាន​​ថ្លែងថា“ ប្រហែ​ល​​ជាពួ​កគេចង់ផ្តោតទៅ​​លើ​ប្រជា​ពល​រដ្ឋ​ខ្លះ​ ដែ​ល​ជួប​បញ្ហាបែបនេះ ពី​ព្រោះ​រឿងនេះគេបា​ន​ជជែកគ្នា​ច្រើន​នៅ​រាជធានី​ភ្នំ​ពេញ​”។ ​លោក​បា​ន​ព្រមា​ន​ថា “ប្រហែល​គេ​នឹង​ធ្វើ​ឲ្យ​ពល​រដ្ឋខ្លះក្នុង​រាជ​ធា​នី​ភ្នំពេញ​ដឹង​អំព​ី​បញ្ហា​នេះ​ឡើង​វិញ។ប៉ុន្តែ ខ្ញុំ​មិន​ដឹង​ថា យុទ្ធ​នា​កា​រ​បែបនេះនឹង​មានឥទ្ធិពលអ្វី​ខ្លះនោះ​ទេ​”។ គណ​​បក្ស​ប្រជា​ជ​ន​កម្ពុជា ​ដែ​លកំពុង​គ្រប់​គ្រង​អំ​ណាច​ បានលើកឡើងថា មា​ន​ពល​រដ្ឋ​​មួ​យ​ចំ​នួ​ន​តូច​ប៉ុណ្ណោះ​ ចា​ប់​អា​រម្មណ៍​ចំពោះ​ការបើក​បររថយន្ត​ទៅគ្រប់​ទី​កន្លែង​​ ដើម្បី​បញ្ចាំ​ង​សម្រែក​​​យំ​​របស់​អ្នកដែល​​ត្រូ​វ​បណ្តេញ​ចេញ​។ លោកហូវស៊ីណេតចៅ​សង្កាត់​វត្ត​ភ្នំ​ និង​ជាសមា​ជិ​ក​គណ​​បក្ស​ប្រជា​ជន​កម្ពុជា​បា​ន​មា​នប្រ​សាសន៍​ថា “ ខ្ញុំ​គិត​ថា ប្រជា​ពល​រដ្ឋ​ភាគ​ច្រើ​ន​មិន​ចាប់អា​​រម្មណ៍​នឹង​យុទ្ធ​នា​កា​រ​របស់​គណ​​បក្សសម ​រង្ស៊ីឡើយ​”។ លោកហូវស៊ីណេតបា​ន​មា​ន​ប្រ​សាសន៍​ថា “ គណ​​បក្ស​ប្រជា​ជន​កម្ពុជា​ក៏​មា​ន​​អំពី​​​គោលនយោបាយ​តា​ម​វី​ដេអូដែរ​​​ដោយ​​​និយាយអំពី​​សកម្មភាព​​ថ្នាក់​ដឹក​នាំ​​របស់​គណ​​បក្ស​ប្រជា​ជន​កម្ពុជា​​​...​​​ប្រជា​ពល​រដ្ឋ​កាន់​តែ​ច្រើនបាន​​ចាប​់​អា​​រម្មណ៍​នឹង​ខ្សែ​វី​ដេអូ​​​របស់​​​គណ​បក្ស​ប្រជា​ជន​កម្ពុជា​”៕ (រា​យ​កា​រណ៍​បន្ថែម​ដោយអ៊ាងម៉េង​ឡេង​)                   ប្រែ​សម្រួ​ល​ដោយចេវប៊ុននី

ពេល​​នេះ​ ឈូក ​​បណ្ឌិត ​​​ស្ថិត​​ក្រោម​​ការ​គ្រប់គ្រង​របស់​តុលាការ

​​​យោងតាម​​​​​លោក ​​​ពេជ្រ ​​​​​​​​ឈឿត​ ​ចៅ​​ក្រម​​​​ស៊ើប​​សួរ​​​ បាន​​ឲ្យ​​ដឹងថាសាលា​​ដំបូង​​ខេត្ត​​​ស្វាយ​​​រៀង​ បាន​​ដាក់​ឲ្យ​លោកឈូក​​ បណ្ឌិត ​​​​អតីត​អភិបាល​ក្រុង​​បាវិត​​​​​ ​​​​ស្ថិត​ក្រោម“​​ការ​គ្រប់​គ្រង​”​ របស់​​តុលាការ​​​​​​ ​បន្ទាប់​ពី​​​​បាន​សាក​​សួរ​​​​បុរស​​រូប​នេះ​កាលពី​សប្តាហ៍​​មុន ​​​ទាក់​ទិន​​នឹង​​​ការ​​បាញ់​​ប្រ​​ហារ​​​​កម្ម​​ការិនី​​កាត់​ដេរ​​​​បី​​​នាក់​​កាលពី​​ថ្ងៃ​ទី​២០ ​​ខែ​​​​​​កុម្ភៈ។ លោក​​​បាន​​មាន​​ប្រ​សាសន៍​ថា ​អតីត​អភិ​​បាល​​​​ក្រុង​រូប​នេះ​​ត្រូវ​បាន​សាកសួរ​​កាលពី​​ថ្ងៃ​ទី​២២​​ ខែឧស​ភា​​ជុំ​​​​​​​វិញ​​​ការ​ជាប់​ពាក់​ព័ន្ធ​​​​​​របស់​​លោក​​នៅ​ក្នុង​​ការ​​បាញ់​​ប្រហារ​កម្ម​ការិនី​ទាំង​​បី​​​នាក់​​នេះ​អំឡុង​​​​​ពេល​តវ៉ា​​​​​​​​​​​​​នៅ​​​​តំបន់​​សេដ្ឋ​​កិច្ច​​ពិសេស​​​មួយ​​ក្នុង​​ក្រុង​បាវិត​។​ទោះ​​បី​​ជា​សាក្សី​​និយាយ​​​ថា ​​លោក​​ ​​​​​​​ឈូកបណ្ឌិត ​​​បាន​បាញ់​​​ប្រ​​ហារ​​​​កម្ម​ការិនី​ទាំង​​នេះអំឡុង​​ពេល​​​​​តវ៉ា​​​​​​​​នៅ​​រោង​​​​​ចក្រ​​​ក៏​​ដោយ​ ​ក៏​ព្រះ​រាជ​អាជ្ញា​​អម​សា​​​លា​​ដំបូង​​​​ខេត្ត​​​​​​​​​ព្រៃ​​វែង ​​បាន​ចោទ​​ប្រ​​កាន់​គាត់​​​​ពី​បទ​​​​​បង្ក​របួស​​ស្នាម​​​ដោយ​​អចេត​នា​​​។ បណ្តា​អង្គ​​ការ​សិទ្ធិ​មនុស្ស​​​បាន​​​​​ថ្កោល​​ទោស​​ចំ​ពោះ​​​ការ​​ចោទ​​ប្រ​​កាន់​​​​នេះ​​ថា ​​វា​ស្រា​ល​​ពេក​​​​ហើយសម្រាប់​បទ​​​​​ឧក្រិដ្ឋ​​នេះ​។ពេល​សួរ​​ថា​តើលោក​​ប្រ​​ហែល​ជាបាន​ផ្លាស់​​ប្តូរ​​ការ​​​ចោទ​​ប្រ​កាន់នេះ​ឬ​យ៉ាង​ណា​​នោះ ​លោក​ ពេជ្រឈឿតបាន​​មាន​​ប្រ​សាសន៍​ថា ​លោក​គ្មាន​​អំ​ណាច​​​ធ្វើ​​ដូច្នេះ​​​​ទេ​​។ លោក​បាន​​​​​មាន​​ប្រ​សាសន៍ថា“យើង​​បាន​​សម្រេច​​ដាក់​ឲ្យ​​​គាត់​ស្ថិត​​ក្រោម​​ការគ្រប់​គ្រង​​របស់តុលាការ​​​...

ចាប់​ខ្លួន​គ្រូប​ង្រៀន​ម្នាក់​ពី​បទ​​​​​​ បង្ហោះ​រូប​អាក្រាតក្នុង​​​​​​ហ្វេសប៊ុក

នគរ​បាលបាន​និ​យាយ​កាល​ពី​​​ថ្ងៃ​​ទី​២៧ ​​​ខែ​​​​​​ឧសភា​​ថា ​​​សា​លា​ដំបូង​ខេត្ត​បាត់​ដំបង​បាន​ចោទ​ប្រ​កាន់​​គ្រូ​បង្រៀន​ម្នាក់​​​នៅ​​សា​លា​បឋម​​​​សិក្សា​ពីបទ​​ផលិត​ និង​ចែក​ចាយ​រូបភាព​​អាស​អាភាស​ បន្ទាប់​ពី​​ជន​​នេះ​​បាន​​​បង្ហោះ​​រូបថត​អា​ក្រាត​​​នៃ​អតីត​មិត្ត​ស្រី​​​របស់​​ខ្លួន​​លើ​ទំព័រ​​​បណ្តាញ​​​សង្គម​ហ្វេសប៊ុក។​​ លោកប៊ន​ វណ្ណារ៉ា ​នាយ​​រង​​​ការិយា​​​​​​ល័យ​នគរ​បាលប្រឆាំង​ការ​ជួញ​ដូរ​មនុស្ស​ខេត្ត​ ​បាន​មាន​​ប្រ​សាសន៍​​​​ថាឈ្មោះ ​សោម ​វឌ្ឍន: អាយុ​​​​៤៦ឆ្នាំ​ ត្រូវ​បាន​ចាប់​ខ្លួន​​​នៅ​ឯ​សាលា​បឋម​សិក្សា​​​​​ជើង​ទីង​​ក្នុងឃុំធិបតី​​​​ ស្រុក​គាស់​ក្រឡ​ ខេត្ត​បាត់​ដំបង​​ កាល​ពី​ថ្ងៃ​ព្រហស្បតិ៍​ បន្ទាប់​ពី​អតីត​មិត្ត​ស្រី​​​​អាយុ​៣២​​ឆ្នាំ​​​​​​រប​ស់​​ជន​នេះ​ បាន​ដាក់​ពាក្យ​បណ្តឹង​​​ទៅ​​ការិយាល័យ​នគរ​បាល​ប្រឆាំង​ការជួញ​ដូរ​មនុស្ស​ខេត្ត​​ នៅ​ពេល​ដែល​​​​ជន​រង​គ្រោះ​បាន​​ឃើញ​រូប​ថត​របស់​ខ្លួន​នៅ​ក្នុង​​​​​អីុន​ធើណិត។ លោក​ វណ្ណារ៉ា​ បាន​មាន​ប្រសាស​ន៍​ថា “​ យើង​​​បាន​ចាប់​ខ្លួន​​ជន​​នេះ​​​​មួយ​​ថ្ងៃ​ បន្ទាប់​ពី​ជន​រង​គ្រោះ​​ដែល​រស់​នៅ​ភ្នំពេញ​ បាន​មក​ដាក់​ពាក្យ​បណ្តឹង​នៅ​ការិយា​ល័យ​នគរបាល​ប្រឆាំង​ការ​ជួញ​ដូរ​មនុស្ស​ខេត្ត​បាត់ដំបង​​របស់យើង​កាល​ពី​ថ្ងៃ​ពុធ”។​...

ក្រុម​អ្នក​​​តវ៉ា​​​ទាម​​​ទារ​​​ឲ្យ​​​ដោះលែង​​​អ្នក​ជាប់​​​ពន្ធនាគារទាំង​១៥នាក់​

អ្នក​​​ភូមិ​​​ប្រហែល​​​១០០​​​នាក់​​​មក​​​ពី​​​សហ​គមន៍​​​បឹង​​​កក់​​​ក្នុង​រាជធានី​​​ភ្នំពេញ​​​បាន​​​​ជួបជុំ​គ្នា​នៅមុខ​​​រដ្ឋ​សភា កាល​​​ពី​​​ម្សិលមិញ ដើម្បី​​​ទាមទារ​​​ឲ្យ​​​ដោះលែង​​​ស្ត្រី​​​១៣នាក់ ​​​ដែល​​​ត្រូវ​​​បាន​​​ផ្ដន្ទា​​​ទោស​​​ឲ្យ​​​ជាប់​​​ពន្ធនាគារ​​​ កាលពី​​​សប្ដាហ៍​​​មុន និងសុំ​ឲ្យ​ដោះលែង​​​​​មនុស្ស​ពីរ​​​នាក់​​​ផ្សេង ទៀត​ដែល​​​ពេល​​​នេះកំពុង​​​​ស្ថិត​​​ក្នុង​​​ការ​​​ឃុំ​​​ខ្លួន​បណ្តោះ​អាសន្ន​​បណ្តាល​មក​ពី​​​​​​​គម្រោង​​​អចលនទ្រព្យ​របស់​សមាជិក​​​​ព្រឹទ្ធ​​​សភាមួយរូប​​ពី​គណបក្ស​​​កំពុង​​​កាន់​​​អំណាច​​​។ អ្នក​​​ចូល​​​រួម​​​ក្នុង​​​បាតុ​​​កម្ម​​​នោះ បាន​​ប្តេជ្ញា​​​​បន្ត​ការ​​​​តវ៉ា​​​ប្រឆាំង​​​នឹង​​​ការ​​​បណ្ដេញ​ប្រជា​ពល​​​រដ្ឋ​​​ចេញពី​​​សហគមន៍​​​បឹង​​​កក់​​​ ទោះ​​​បី​​​ជា​​​ការតវ៉ា​​បែបនេះ​​បាននាំ​​​ឲ្យមាន​​​ការ​​​ចាប់​​​ខ្លួន​​​​​​ប្រជាពល​​​រដ្ឋ​​១៥​​​នាក់​​​ ដែល​​​ភាគច្រើនជាអ្នកដឹក​​​នាំ​​​បាតុកម្ម​របស់​សហគមន៍​នេះ។ នៅ​​​ខាង​​​ក្រៅរដ្ឋសភា អ្នក​​​តវ៉ា​​​បានលើក​​​បដាដែល​​​មាន​​​ខ្លឹមសារថា “ដោះ​​​លែង​​​មនុស្ស​ទាំង​​​១៥នាក់” និង​​​ “ ឈប់​​​ប្រើ​​​អំពើ​​​ហិង្សា”។ យ៉ម បុប្ផា អ្នក​​​តវ៉ាម្នាក់​​​ក្នុង​​​ចំណោម​​​អ្នក​​​តវ៉ាទាំង​​​អស់បាន​​​និយាយថា “ យើង​​​នឹង​​​បន្ដ​តវ៉ា រហូត​​​ទាល់​​​តែ​​​ពួកគេ​​​ដោះ​​​លែង​​​មនុស្ស​​ទាំង​​​១៥​​​នាក់​​​នោះ។ យើង​​​ក៏​​​ព្រួយ​​​បារម្ភផង​​​ដែរថា នគរបាល​​​នឹង​​​ចាប់​​​ពួក​​​យើង​​​ដែរ​ ប៉ុន្តែយើង​​​គ្មាន​​​ជម្រើស​​​ទេ។ យើង​​​ត្រូវ​​​តែ​​​តវ៉ា​​​ឲ្យ​​​ដោះ​​​លែង​​​ពួកគេ”។ ស្ត្រី​​​១៣ត្រូវ​​​បាន​​​ចាប់​​​ខ្លួន​​​​​​អំឡុង​​​ពេល​​​តវ៉ា​​​ដោយ​​​សន្ដិ​​​វិធី​​​កាលពី​​​ថ្ងៃទី​​​២២​​​ ខែ​​​ឧ​​​សភា ​ប្រឆំាង​​​​នឹង​​​គម្រោង​​​អចលន​​​ទ្រព្យ​របស់​​​​លោក ​ឡៅ ម៉េងឃិន សមាជិក​ព្រឹទ្ធ​​​សភាមក​​​ពី​​​គណ​បក្សប្រ​​​ជាជន​​​កម្ពុជា ​​​និង​​​ត្រូវបាន​​​សាលាដំបូង​រាជធានី​​​ភ្នំពេញ​​​ផ្ដន្ទាទោស កាលពី​​​ថ្ងៃ​ព្រហស្បតិ៍ពី​​​បទ​​​កាន់​​​កាប់​​​ដី​​​ដោយខុស​​​ច្បាប់​​​ និងពី​បទ​​​​ស្ថាន​​​ទម្ងន់​​​ទោស​នៃ​បទ​​​ប្រឆាំងនឹង​​​អ្នក​​​រាជ​ការ​​​សាធារណៈ។​​​ ស្ត្រី​ទាំង​នេះ​​​ត្រូវបាន​​​កាត់​​​ទោស​​​ភ្លាម​​​ៗ​​​ឲ្យ​​​ជាប់​​​ពន្ធ​​​នាគារ​​​រយៈពេល​​​ពីរ​ឆ្នាំ​​​កន្លះ។​​​ មនុស្ស​ពីរ​​​នាក់​​​​ផ្សេងទៀត​​​​​​ត្រូវបាន​​​ចាប់​​​ខ្លួន​​​នៅ​​​ខាង​​​ក្រៅ​តុលាការ​ ហើយ ​​​ពេល​នេះ​​​​ត្រូវ​​​ប្រឈម​​​នឹង​​​បទ​ចោទ​​​ប្រ​​​កាន់​​​ដូច​​​គ្នា។ សកម្មជនជា​​​ព្រះសង្ឃដ៏​​​ល្បីមួយ​អង្គ​ព្រះនាម​​​ លួន សុវ៉ាត ​​​​​​ជាអ្នក​​​គាំ​​​ទ្រ​​​អ្នក​​​ភូមិ​​​​​​​​​​បឹង​​​កក់​​​ជាយូ​រ​​មក​​​ហើយ ​​​និង​បានប្រឈម​​​នឹង​​​បញ្ហាផ្ទាល់​របស់​​​ព្រះ​​​អង្គ​​​កាលពី​​​​​សប្ដាហ៍​​​មុន​​​​​​ ក៏​​​បាន​​​ចូល​​​រួម​​​​​​ជា​​​មួយ​​​អ្នក​​​តវ៉ា​​​ទាំង​​​នោះ​​​ដែរ។ ​​​ អំឡុង​ពេល​បើក​សវនាការ​កាត់​ទោសស្ត្រី​​ទាំង​នោះ កាលពី​​​ថ្ងៃ​​​ព្រហស្បតិ៍ កម្លាំង​​​នគរ​បាល​​​បាន​​​ចាប់​​​ព្រះ​តេជគុណ ​លួន សុវ៉ាត ​​​បញ្ចូល​ ​រថយន្ដមួយ​គ្រឿង​​​​ និង​​​បាន​​​ដឹក​ព្រះ​អង្គ​​​​ទៅ​​​កាន់​​វត្តមួយ ​​ដែល​​​នៅ​​​ទី​​​នោះ ​ព្រះ​អង្គ​​​ត្រូវ​​​បាន​​​ សង្ឃនាយករាជធានី​​​ភ្នំពេញទាម​ទារ​​​ឲ្យ​​​ចុះ​​​ហត្ថលេខា​លើ​​​កិច្ច​​​សន្យា​មួយ​​​មិន​​​​ឲ្យ​​​ពាក់​​​ព័ន្ធ​​​​​​​​​​​​​​​​​​​​​​​​​​​​​​​​​ក្នុង​​​ជម្លោះ​​​របស់​​​អ្នក​​​សហគមន៍​​​បឹង​​​កក់។​​​ ​​​ព្រះតេជគុណ​ លួន សុវ៉ាត បាន​​​រំលោភ​​​កិច្ច​សន្យា​នោះ ​​​​ដោយ​​​​​ការ​​​ចូល​​​រួម​​​ក្នុង​​​បាតុ​​​កម្ម​​​កាល​​​ពី​​​ម្សិលមិញ។ ព្រះ​អង្គ​​​បាន​​​មាន​​​សង្ឃដី​​​កា​​​ថា ព្រះអង្គ​​​បាន​​​យល់​​​ព្រម​​​តាម​​​សំណើរ​​​របស់​​​សង្ឃ​​​នាយក កាលពី​​​ថ្ងៃ​​​សុក្រ ដោយសារ​​​​​​​តែ​មាន​ការ​គំរាម​​​​​ផ្សឹក​​​ព្រះ​​​អង្គ ប្រ​​​សិន​​​បើ​​​​​​ព្រះ​​​អង្គ​​​បដិសេធ​​​នោះ​​​។ ព្រះ​​​តេជគុណ លួន សុវ៉ាត បាន​​​មាន​​​សង្ឃ​ដី​​​កា​​​នៅ​​​ចំពោះ​​​មុខ​​​អ្នក​​​គាំ​​​ទ្រ​​​ដែល​​​កំពុង​​​កាន់​​​ផ្កាឈូកយ៉ាង​​​ដូច្នេះថា “ប្រសិន​​​បើ​​​សង្ឃ​នាយក​​បញ្ជា​​​ឲ្យ​​​អាត្មា​​​សម្លាប់​​​នរ​ណា​​​ម្នាក់​​​ តើ​​​អាត្មា​​​ត្រូវ​​​​តែ​​​ធ្វើឬ? ប្រ​​​សិន​​​បើ​​​សង្ឃនាយក​ទាំង​នោះ​បញ្ជាអាត្មា​​​ឲ្យ​​​ប្លន់​​​នរណាម្នាក់ តើអាត្មា​​​ត្រូវតែ​​​ ប្លន់​​​ឬ?​​​ ទេ អាត្មា​​​នឹង​​​មិន​​​ធ្វើ​ដូច្នេះ​ទេ។ដូច្នេះ​ សង្ឃ​នាយក​បាន​​​ហាម​​​អាត្មា​​​មិន​​​ឲ្យ​​​មក​មើល​​​ការរង​​​ទុក្ខ​សោក​​​របស់​​​ប្រ​​​ជាពល​​​រដ្ឋ​​​ទាំង​នេះ ​​​ប៉ុន្តែ​​​ អាត្មា​​​មិន​​​អាច​​​ធ្វើ​​​តាម​បាន​​​ទេ។ អាត្មា​​​ត្រូវ​​​តែ​​​មក​​​មើល​​​ពួកគាត់ និង​​​ជួយ​​​រំលែក​​​ទាំង​​​សេចក្ដី​​​សុខ ​និង​​​សេច​​​ក្ដី​​​ទុក្ខរបស់​​​ពួកគាត់”។ ខណៈពេល​​​ទទួល​​​បាន​​​ពានរង្វាន់​​​សិទ្ធ​​ិ​មនុស្ស​​​ពី​បរទេស ព្រះ​​​តេជគុណ លួន សុវ៉ាតបានធ្វើ​ឲ្យ​មន្ត្រី​សង្ឃ​មាន​ការ​ខឹង​សម្បា​ជា​យូរ​មក​ហើយ ​ដោយ​​សារ​ព្រះ​អង្គ​ចូល​រួម​នៅ​ក្នុង​ការ​តវ៉ា​បែប​នេះ​​​។​ កាល​​​ពីឆ្នាំ​​​មុន​ ព្រះ​តេជគុណ​​​​​​ត្រូវបាន​​​ហាមមិនឲ្យ​គង់​នៅ​​​​ក្នុងវត្ត​​​ទាំង​​​អស់នៅ​​ក្នុង​​​​រាជធានី​​​ភ្នំពេញ​​​​​​ ហើយ​​​នៅពេល​​​នេះ​​​​​​ប្រឈម​​​នឹង​​​ការ​​​ចោទប្រកាន់​​​ពី​​​បទ​​​ញុះ​​​ញង់​​​ឲ្យ​​​មាន​​​សកម្មភាព​​​នានា ដែល​​​មន្ត្រីតុលាកា​​រ​​​មិនទាន់​​​បញ្ជាក់នៅឡើយ​​​ទេ​​​ថា ​​​ជា​​​សកម្មភាព​​​​​​​​អ្វីនោះ​​​។ ចំណែក​ឯ​ក្រុមអ្នក​តវ៉ា​​​ត្រូវ​​​បាន​​​អនុញ្ញាត​​​ឲ្យ​​​ចូលក្នុងរដ្ឋ​សភា​​​​ដើម្បី​​​​ដាក់​សំណើ​​​ជា​​​លាយលក្ខណ៍​​​អក្សរ ​​​ហើយ​​​បន្ទាប់​​​មក ក៏​​​បានបំ​​​បែក​​​គ្នា​​​ដោយ​សន្តិ​វិធី​​​មុន​​​ពេលថ្ងៃត្រង់​​​ ។ លោក​​​ ជិន លីដា​​​​​​ មេធាវី​​​ម្នាក់​​​ក្នុង​​​ចំណោម​មេធាវី​​​បី​​​នាក់​​​ ដែលត្រូវ​​​បាន​​​អង្គការ​​​សិទិ្ធ​មនុស្ស​លីកាដូ ចាត់តាំង​​​ឲ្យ​​​ការពារ​​​ស្រ្តី​​​ ដែល​​​ត្រូវ​​​ផ្ទន្ទាទោសទាំង​នេះ​​​​​​​​​​ បាន​​​ថ្លែងថា ​​​ បណ្តឹង​​​ឧទ្ធរណ៍​​​​ត្រូវ​​​បាន​​​ធ្វើ​​​ឡើង​​​នៅ​សាលា​ដំបូង​​​​​​​រាជធានី​ភ្នំពេញ​​​កាល​​​ពី​​​ម្សិល​​​មិញ​​​។ “ ​​​យើង​​​បាន​ប្តឹង​​​ឧទ្ធរណ៍​​​ថ្ងៃនេះ​​​ ហើយ​​​យើង​​​សង្ឃឹម​​​ថា​​​សាលាដំបូងរាជធានីភ្នំពេញ​​​នឹង​​​បញ្ចូន​​​សំណុំ​​​រឿង​​​នេះ​​​ទៅ​​​​សាលា​​​​ឧទ្ធរណ៍​​​ឲ្យបាន​​​ឆាប់​​​តាម​ដែល​អាច​ធ្វើ​ទៅ​បាន​​​”។ នៅក្នុង​​​សេចក្តីថ្លែង​​​ការណ៍​​​មួយ​​​​ទទួល​បាន​​​​កាលពីថ្ងៃ​​​អាទិត្យ លោក​​​នាយក​រដ្ឋ​មន្ត្រី ហ៊ុន​​​សែន បាន​​​ជំរុញឲ្យ​​​ប្រជាពលរដ្ឋ​​​ដែល​​​ពាក់​ព័ន្ធ​ក្នុង​​​ជម្លោះដី​​​ធ្លី​​​បែបនេះ​ធ្វើ​​​​ការ​​​តវ៉ា​​​ “ ដោយ​សន្តិវិធី​​​”  និង​​​បាន​​​ទទូច​​​សំុឲ្យ​​​ពួកគាត់​​​ដាក់​​​ពាក្យ​បណ្តឹង​ទៅ​​​​រដ្ឋាភិបាល​​។ លោក​​​ក៏បាន​​​ជំរុញ​ផង​​​ដែរ​​​ ឲ្យអាជ្ញា​​​ធរ​​​និងកម្លាំង​​​សន្តិសុខ​​​ “រក​គ្រប់​​​មធ្យោបាយទាំងអស់​​​​” ​​​ដើម្បី​​​ការ​​​ពារ​​​សិទ្ធិ​របស់​​​ប្រជាពលរដ្ឋទាំង​​​នោះ ​និង​​​ដោះ​ស្រាយ​បញ្ហា​របស់ពួកគាត់​ឲ្យបាន​​​រួសរាន់​​​។ សេចក្តីថ្លែងការណ៍​​​នេះ​​ធ្វើ​​​​ឡើង​​​បន្ទាប់​​​ពី​មាន​​​ការ​​​តវ៉ា​ជាច្រើន​​​​​​​​ពាក់ព័ន្ធនឹង​​​ជម្លោះ​​​ដីធ្លី​​​ក្នុង​​​​​​ប៉ុន្មាន​​​ខែថ្មីៗនេះ​​​ ដែល​​​ក្នុង​​​នោះ​​​កម្លាំង​​​នគរបាល​​​ ទាហាន​​​ និងសន្តិសុខ​​​ឯកជន​​​បាន​​​បាញ់​​​ឲ្យរបួស​​​ និង​​​បាញ់​​​សម្លាប់​​​បាតុករ៕  ប្រែសម្រួលដោយ​​​ ហម សុផាណ្ណា   ​​ ​​​ ​​​​​​

ក្រុម​ហ៊ុន​ អីុនហ្វូបាន ប្តឹង​ក្រុម​ហ៊ុន​ ថៃខម រឿងលក់​ភាគ​ហ៊ុន៥១​​​ភាគរយ​​​របស់​ក្រុម​ហ៊ុន​ អឹមហ្វូន 

ក្រុមហ៊ុន​បច្ចេកវិទ្យា​ព័ត៌មាន​ថៃ​ អុីនហ្វូ​បាន​ ខូ​ អិលធីឌី (Infobahn Co. Ltd.) បាន​ដាក់​ពាក្យ​បណ្តឹង​ប្តឹង​ក្រុមហ៊ុន​ ថៃខម​ ផាប់ប្លីកខម​ភែនី អិលធីឌី (Thaicom Public Company Ltd) ​ពីបទរំលោភ​កិច្ចព្រមព្រៀង​ ដែល​បានសម្រេចកាល​​​ពី​​​​ឆ្នាំ​មុន​ស្តីពី​ការ​លក់​ភាគហ៊ុនរបស់​ខ្លួន​​ចំនួន​៤១,១៤​ភាគរយដែល​កិច្ច​ព្រមព្រៀង​នេះ​ក៏​រាប់បញ្ចូល​ទាំង​ភាគហ៊ុន​ចំនួន​៥១​ភាគរយនៅ​​​​ក្នុង​ក្រុមហ៊ុន​ផ្តល់​សេវាទូរស័ព្ទ​ចល័ត​នៅ​​​កម្ពុជា​ គឺ​ក្រុមហ៊ុន​អឹមហ្វូន​ (Mfone) ផងដែរ​នោះ​។​ យោងតាម​សេចក្តី​ជូន​ដំណឹង​ដែល​ផ្សារ​មូលបត្រ​ថៃ​បាន​ចេញ​ផ្សាយ​កាល​ពី​សប្តាហ៍​មុនបាន​​​ឲ្យ​​​ដឹង​​​ថា ​ លោក​​​ ដាំរ៉ុង​ កាសិមសេតស្ថាបនិក​ក្រុម​​​ហ៊ុន​ អុីនហ្វូបាននិង​ជាអតីត​ប្រធាន​នាយក​ប្រតិបត្តិ​​ក្រុមហ៊ុន​ថៃខម​​ ​ កំពុង​​​​​ប្តឹង​ទាំងក្រុម​ហ៊ុន​ថៃខម​​ និង​សមាជិកភាគ​​​ហ៊ុន​មួយ​ក្នុង​ចំណោម​សមាជិក​​​ភាគ​​​ហ៊ុន​​​របស់​​​ក្រុមហ៊ុន​នេះ គឺ​ក្រុមហ៊ុន​ អុីនថច់​ (InTouch) ​ ដែល​មាន​​​ឈ្មោះ​​​ដើម​​​ថាសុីន​ ខប​ (Shin Corp.) បន្ទាប់​ពី​ក្រុម​ហ៊ុននេះ​​​ ខកខាន​ក្នុង​ការ​លក់​ភាគហ៊ុន​របស់​ខ្លួន​ឲ្យ​ក្រុមហ៊ុន​របស់​លោក​។​ ទាំង​ក្រុមហ៊ុន​ ថៃ ខម​ និង​ក្រុមហ៊ុន​​ អុីន ថច់​បាន​បដិសេធ​​ការ​ចោទប្រកាន់​ទាំងនេះ​។​ លោក​ស្រី​ ស៊ុផាជី ស៊ុធុម​ពុន ប្រធាននាយក​​ប្រតិបត្តិ​ក្រុមហ៊ុន​ ថៃ ខម​ បាន​លើកឡើង​តាម​រយៈ​អុីម៉េល​មួយ​​កាលពី​សប្តាហ៍​មុន​ថា“​​ថៃខម​ និង​អុីន​ថច់បាន​ជូន​ដំណឹង​ទៅ​ផ្សារ​មូលបត្រ​ថៃ​រួចហើយ​ថា ​ អុីនថច់​ មិន​ដែល​បាន​សម្រេច​កិច្ច​ព្រមព្រៀង​ណាមួយ​​ស្តីពី​ការ​លក់​ក្រុមហ៊ុន​ថៃ​ ខម​ ដូច​ការ​អះអាង​របស់​លោក​ ថាំរ៉ុង ឡើយ​។​ ​​យើង​នៅ​គ្រប់គ្រង​ប្រតិ​បត្តិការ​របស់​យើង​ដដែល​ទេ​ អ្វីៗ​ដំណើរការ​ជាធម្មតា​ទេ”។​ គួរ​បញ្ជាក់​ថា​ នៅ​ក្នុង​ពេល​កន្លងមក​ លោក​ស្រី​ ស៊ុធុម​ពុន​ ធ្លាប់​បាន​បញ្ជាក់​ថា ក្រុមហ៊ុន​ អឹម​ហ្វូន​ ​​​បាន​ចរចា​ជាមួយ​ក្រុមហ៊ុន​ផ្តល់​សេវា​ទូរ​ស័ព្ទ​ដៃ​​ផ្សេងៗ​ទៀត​​ អំពី​ការ​លក់​ក្រុមហ៊ុន​មួយ​នេះ​ ប៉ុន្តែ​ពុំធ្លាប់​បាន​​បញ្ចេញ​​ឈ្មោះ​របស់​ក្រុមហ៊ុន​ណាមួយ​ឡើយ​។​ ​លោក​ អាទីប​ រឹតតា​ផន​ ប្រធាន​នាយក​ប្រតិបត្តិ​បណ្តោះអាសន្ន​របស់​ក្រុមហ៊ុន​អឹម​ ហ្វូន និង​ជា​​​​នាយក​គ្រប់គ្រង​ក្រុមហ៊ុន​ សេនីង​តុន​ អុីនវេសមិន​ (Shenington Investments) ដែល​មាន​មូលដ្ឋាន​នៅ​ក្នុង​ប្រទេស​​សិង្ហបុរី បាន​លើកឡើង​ថា ​ក្រុមហ៊ុន​នេះ​នៅ​បន្ត​ប្រតិបត្តិ​ការ​​របស់​ខ្លួន​នៅ​ក្នុង​ប្រទេស​កម្ពុជា​ក៏​ពិតមែន​...